Yevropa Ittifoqi mamlakatlari o‘rtasida ilmiy-texnik hamkorlikni yanada rivojlantirish bo‘yicha hamkorlik

Joriy yilning 14 iyun kuni Fan va texnologiyalar agentligida Yevropa Ittifoqi mamlakatlari o‘rtasida ilmiy-texnik hamkorlikni yanada rivojlantirish va kengaytirish bo‘yicha uchrashuv bo‘lib o‘tdi.

Joriy yilning 14 iyun kuni Fan va texnologiyalar agentligida Yevropa Ittifoqi mamlakatlari o‘rtasida ilmiy-texnik hamkorlikni yanada rivojlantirish va kengaytirish bo‘yicha uchrashuv bo‘lib o‘tdi. Mazkur uchrashuvda Fan va texnologiyalar agentligi rahbariyati va xodimlari, Oliy va o‘rta maxsus ta’lim, Sog‘liqni saqlash, Qishloq va suv xo‘jaligi va boshqa vazirliklar mas’ul xodimlari, Fanlar akademiyasi vitse-prezidenti hamda O‘zbekiston Respublikasining Belgiya qirolligidagi Favqulodda va muxtor elchisi ishtirokida O‘zbekiston Respublikasi Prezidenti Sh.M.Mirziyoyev tomonidan bildirilgan fikr-mulohazalar hamda ko‘rsatmalaridagi masalalardan biri bo‘lgan, xalqaro ilmiy hamkorlikni rivojlantirish, sohaga chet el investitsiyalarini jalb qilish imkoniyatlari muhokama qilindi.

Dastlab Agentlik Bosh direktori Mahmudjon Boltabayev so‘zga chiqib, bugungi kunda yurtimizda amalga oshrilayotgan islohotlar, Davlatimiz Rahabari tomonlaridan ilm-fan sohasida xalqaro hamkorlikni rivojlantirish, sohaga chet el investitsiyalarini jalb etish bo‘yicha qo‘yilayotgan talablar, bu vazifalarni ijrosini ta’minlashda Agentlik va Tashqi ishlar vazirligi, xususan, elchilarning roli xususida gapirdi. Chet el investitsiyalarini jalb qilishda mamlakatimizda ilmiy-texnik loyihalarning puxta tayyorlanishiga jiddiy e’tibor qaratish lozimligini aytib o‘tdi.

Shundan so‘ng, O‘zbekiston Respublikasining Belgiya qirolligidagi Favqulodda va muxtor elchisi Dilyor Hakimov so‘zga chiqib, o‘z so‘zida bugungi qo‘yilayotgan talablar hamda Yevropa Ittifoqi mamlakatlarini ko‘proq qaysi yo‘nalishlardagi ilmiy tadqiqotlar qiziqtirishi va aynan qaysi jihatlarga e’tibor qatarish lozimligi to‘g‘risida gapirdi. Fanlar akademiyasi vitse-prezidenti Sirojiddin Mirzayev bilan elchi o‘rtasida savol-javob muloqoti o‘tkazildi.

Agentlik Bosh direktorining birinchi o‘rinbosari Odilxo‘ja Parpiyev tomonidan taqdimot qilindi va unda O‘zbekiston intellektual salohiyatini yuqori darajaga ko‘tarish va Yevropa Ittifoqining ilmiy-texnik va innovatsion faoliyatga yo‘naltiradigan investitsiyalarini maqsadli o‘zlashtirish mumkin bo‘lgan loyihalar to‘g‘risida gapirdi.